كارول صنصور: أصورك

By Carol Sansour

By Carol Sansour

كنا وكأنه من زمان
نلعب “أميرتي”
أحط لك مكياج
وألبسك وردًا وخرزًا
ثم آخذ لك صورة
كنا نقعد على مرجيحة بلكوننا العالي
أنت حاملة “الناضور”
وأنا مسطلة بالمنظر
كنا نراقب سطح حبيب متخيل اسمه (طيزه متل القمر)
كنا نلقط حَنّونًا ووردًا أصفر
كنتِ حافية
وبين العشب كنا نخفي أسرارًا
كنا نحكي لحد ما الديك يزهق ويصيح
والشمس تطلع من البحر الميت ورطوبة البلد تبلل حراماتنا
كانت تلال قشر البزر ووتيرة تقشيرها على طاولة المطبخ مقياسًا لحجم مواضيعنا:
الوظيفة: وقية
العائلة: وقياين
الحب: كيلو + ألواح شكولاته
كنا نلعب “أميرتي”
وأصورك